पनवेलमधील उपजिल्हा रुग्णालयात शीत शवपेटी आजपासून उपलब्ध!

Panvel

कधी काही प्रसंगात कायदेशीर बाबीं किंवा नातेवाईकांच्या सोयीसाठी मृतदेह काही काळ जतन करून ठेवावा लागतो. त्यासाठी आवश्यक असणारे शवगृह पनवेल परिसरात फक्त महात्मा गांधी मिशन हॉस्पिटल, कळंबोली येथेच आतापर्यंत उपलब्ध होते. पानवेलसारख्या महानगरात ह्या सुविधेचा अभाव असल्यामुळे मृतांच्या नातेवाईकांना अत्यंत्य कठीण प्रसंगाला तोंड देत मृतदेह सांभाळावा लागत असे.

त्याची हि अडचण लक्षात घेऊन सदाशिव पेठ मित्रमंडळ, टिळक रोड पनवेल यांच्या प्रयत्नातून नव्यानेच निर्माण झालेल्या पनवेल उपजिल्हा रुग्णालयाच्या आवारात २ शीत शव पेटी (४ मृतदेहांसाठी) बसवून काम पूर्ण करून घेतले. आणि त्याचे लोकार्पण १२ फेब्रुवारी रोजी झाले.

यासाठी शिवसेनेचे स्थानिक नेते श्री. चंद्रशेखर सोमण यांनी मोठी भूमिका पार पाडली. याआधी देखील सोमण यांनी खाजगी कंपनीच्या सी.एस.आर. च्या माध्यमातून रुग्णालयाच्या ऑपरेशन थिएटर साठी पाच लाखाची ऍनेस्थेशिया तसेच अँटी रेबीज औषधे उपलब्ध करून दिली आहेत. त्यावेळी त्यांना या रुग्णालयात शीत शव पेटीची देखील आवश्यकता आहे असे लक्षात आले. अशा वेळी कोणत्याही सरकारी मदतीवर विसंबून न राहता त्यांनी आपल्या मित्र मंडळींच्या कानावर हि गोष्ट घालताच, सदाशिव पेठ मित्रमंडळ या कार्यासाठी धावून आले व वर्गणीतून दोन लाखांची मदत जमवली आणि योग्य तो पत्रव्यवहार करत शासनाची परवानगी मिळवली. तसेच विलंब न करता २८ जानेवारी रोजी यासंबंधी कामाची वर्कऑर्डर काढून कूलटच कंपनी ला कंत्राट दिले.

शीत शव पेटी

सदाशिव पेठ मित्रमंडळातर्फे पनवेल मध्ये गेली १४ वर्ष ऍम्ब्युलन्स व शववाहिका सेवा अत्यंत्य शिस्तीत, विश्वासू आणि सातत्यपूर्ण पद्धतीने चालू आहे. याचं मंडळाने लोकवर्गणीतून आणखी एक सुसज्ज रुग्णवाहिकेचा संकल्प सोडला आहे. त्यालाही परिसरातील नागरिकांकडून भरभरून मदत मिळत आहे.

याप्रसंगी चंद्रशेखर सोमण यांच्यासह मंडळाचे सदस्य श्रीकांत साठे, डॉ. मयुरेश जोशी, महेश गाडगीळ, संजय जोशी, श्रीकांत पाटणकर, अनिल कुळकर्णी, अविनाश सहस्त्रबुद्धे तसेच पनवेलचे वैद्यकीय अधीक्षक नागनाथ येमपले, महावितरणचे जयदीप नानोटे, शिवसेना शहरप्रमुख अच्युत मनोरे, संघटक प्रवीण जाधव, विभाग प्रमुख विश्वास पेटकर, अरुण ठाकूर, महाड बँकेचे व्यवस्थापक विचारे, हॉस्पिटल चे सर्व डॉक्टर्स, अधिकारी, हितचिंतक नागरिक व पत्रकार उपस्थित होते.

Leave a Reply